Leiðarskil

I dag var síðasti dagur Curly og Dofra saman í miðbæ Sydneyar, þar sem Anna er þessa stundina í flugvél frá Asíu á leið heim og Dofri á leið að flytja aðeins út fyrir miðbæinn til systur sinnar.

Þessi dagur hefur farið í þrif og tiltekt og hefur öllu verið stillt upp eins og það var þegar Dofri kom í íbúðina. Hefur Dofri meðal annars ryksugað og verið með heljarinnar tiltektaræði. Öllu jöfnu víkur Curly ekki frá Dofra þegar hann er heima - hann eltir hann herbergi úr herbergi og vill helst sitja á kjöltunni á Dofra eða fyrir framan hann. En í dag er öðruvísi dagur. Curly er í fýlu - hann hefur sökkt sér inn í teppi og vill ekki láta sjást í sig. Meira segja hefur hann ekki hreyft sig þegar Dofri var að ryksuga í hringum teppið!!! og þá er nú  mikið sagt! Sjá myndina þar sem sést aðeins í nebbann á honum.

Í miðri tiltektinni heyrði Dofri mikinn SKELL! Úti er hávaðarok og fyrir utan gluggann hjá Curly veltur um koll stór blómapottur sem er líklega á annan tug kílóa! Dofri sem hélt að það væri árekstur úti fór inn í herbergið til Curlys og sér að hann liggur ennþá undir feld en sér fyrir utan blómapottinn á hliðinni. Þetta er svo ólíkt hinum forvitna Curly að það varð bara að taka mynd af þessu. 

Þegar Dofri var búinn að þrífa allt nema í hringum Curly var kominn tími í að kalla í hann í smá miðdegissnarl. Þá heyrði hann orðið "hungry" og rétt gat lyft sér upp og komið fram og fengið sér smá snarl.

Núna er klukkan að verða sjö og hann er orðinn svangur aftur og kominn undan teppinu, en vill lítið með Dofra hafa. Hann er greinilega gríðarlega spældur ... en það ætti að líða hjá innan skamms þegar Anna kemur inn um hurðina eftir nokkra vikna frí.

 Vonandi hefur Curly það gott í framtíðinni og fær að njóta sín að vera prinsinn á heimilinu enn um sinn. Gangi þér vel Anna með Curlyljón og vonandi eigið þið saman bjarta framtíð

Kveðja

Dofri Örn